قنا- من محمود الدسوقى
النحات الفطرى احمد ابوعمرة وضع على سلالم منزله رأس نفرتيتى وتذكر بعد صلاته انه لم يضع شمعتين على شكل حراب بجوار أسدين فوضعهما على البوابة ... نفسى اعمل تمثال للاله الفرعونى رع بس محدش بيدخلنى لمحافظ قنا... واللى فى جوفى رصد زى رصد الفراعنة على اثارهم
ابويا كان يقول لى مش هاتسيب دا ياولدى فارد الشوق قاتلنى يابويا فينظر لى باستغراب ويتركنى انحت
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ثلاثة أمكنة يصنع فيهما الفنان الفطرى احمد ابوعمرة مواليد 1956فنون النحت التى يهواها... جنب النهر عند زروعه بقرية الدير الشرقى التابعة لمحافظة قنا حيث يمسك من الطمى قطعة يشكلها كانثى حامل يجعل لها عيونا واذانا وفما وبطنا منتفخا يقوم بالتمعن فيها ثم يلقيها للنهر مرة اخرى ليبحث عن طينة اخرى غيرها... المكان الثانى بيته الطينى القديم الذى يضع فيه رسومات للسيد البدوى ( القطب الصوفى الكبير ) والخيول والابقار ومعهم الكاتب المصرى القديم ... والمكان الثالث بيته الجديد المبنى بالاسمنت الذى وضع على طريق السلم الداخلى له راس نفرتيتى صنعها بالاسمنت بجانب اسدين وشمعتين وضعهما على مدخل البوابة يقول لك بلهجة واضحة اتذكرت وانا اصلى فى المسجد انى ماصنعتش شمعتين فقمت بعد نهاية الصلاة بالاتكال على الله وعملتهما على شكل حراب عبارة عن نحت بارز ثم يضحك وهو يرفع الشال من على كتفه قليلا ويسترسل انا بنحت علشان مالينى الاشتياق ابويا الله يرحمه كان دايما يقولى وانا اشكل الطين والاسمنت والجبس مش هاتسيب دا ياولدى فارد سيبنى يابويا انا قتلنى الشوق والاشتياق فينظر لى باستغراب ويتركنى انحت ..يدى تروح للاسمنت والجبس من غير مااشعر ياولدى .. يملانى خيال غريب فى عقلى.. اتحرك.. واصنع ..احرق واكسر.. اضيع فلوسى فى مواد الجبس والاسمنت علشان اتخلص من الاشتياق اللى مالقيت ليه دوا غير انى اعمل اللى هو عاوزو منى... بعدين ارتاح.. اصل اللى ف جوفه اشتياق صعب عليه انه يسيبه .. انا مش بنحت انا اقوم بالبناء البناء فى النحت المجسم هو اللى بيرحنى ومعاه النحت البارز على الحوائط بس انا خيالى فرعونى فى يوم روحت لمحافظ قنا علشان اقوله انا عاوز اعمل تمثال للاله رع فى مييادين قنا بس محدش دخلنى مكتبه ..والله ياستاذ انا عاوز اعمل تمثال لرع فى ميدان ومش عارف ليه انا اشتاق لصنعه بس سيبنى من حديث الاثار وبص بعينك لرسمة السيد البدوى تعجبك خطوط العمة اللى على راسه -اجيب تعجبنى عم عمرة -فيسترسل اللى ف جوفى يشبه الرصد زى رصد الفراعنة اللى وضعوه على لقايا اثارهم علشان كده وضعت رسمة نفرتيتى اللى الناس لما تشوفها والبيت ضلمه بتخاف منها وعلشان انا مش هتخلص من اشتياق خيالى اللى ماللى صدرى رحت لجمعية قرية المحروسة الثقافية لكن انا سبتهم رغم انى خليتهم يعملوا عنى فيلم تسجيلى هيسفروه لفرنسا واخدوا رسوماتى لكلية الفنون بالاقصر نسيت اقولك انى مش بعرف اقرا ولا اكتب مش بعرف اقرا غير القرآن الكريم انا فنان كدا وخلاص علشان زى ماقلتلك فى الاول... اللى ف جوفى رصد يشبه رصد الفراعنة على اثارهم واشتياق صعب
نشر بجريدة اليوم السابع محمود الدسوقى
ليست هناك تعليقات:
إرسال تعليق