قنا محمود الدسوقى لايملك عقارات واطيان وانما يملك قلب رحيم وانسانية عالية
حسن رفاعى الشهير بمحمود الاشلم تبرعت بمدافن لشهداء العبارة خلف مقام سيدى عبد الرحيم من اجل الانسانية المحطمة
ـــــــــــــــــــــــــــــــــــــــــــــــــــــــــــــــــــــــــــــــــــــ
أذا أردت أن تكون انسانا حقيقيا فلا بد ان تكون تلميذا لبائع السمك بسوق السهاريج بقنا حسن رفاعى الشهيربمحمود الاشلم73 عاما ..حين تجده يدخن الشيشة فى احد المقاهى المجاورة للسوق يقف بجسده القصير ويحييك ويحدثك كلاما جميلا من فمه 00التعليم الحقيقى 3 مراحل يابنى الاول الاخلاق الحسنة والتانى تعليم الشعور والاحساس فى الوجدان من جوا القلب والتالت تعليم مساندة الانسان لاخيه الانسان وانا تبرعت بالقرافة والجبانة اللى جهزتها من حر مالى علشان انا احشائى اتقطعت من جوه.. شفت الجثث المتعفنة فى المستشفيات وبكيت وانا اشوف القنوات الفضائية وسديت ودانى وانا اسمع صراخ الناس ذهبت الى مكتب المحافظ مجدى ايوب وانا بهدومى دى اللى فيها زفر سمك ودخلتله قلت له يامحافظ انا عاوز اوارى جثث اخوتى المصريين خدوا الجبانة اللى هى بتاعتى وبتاعة عيلتى ولموا عوارة اهلنا والمحافظ استجاب ..أتيت بالبنايين والمغسلين وجبت الاكفان واللى دفعتوا من اموال فيها معرفش كام ومش هقول كام دا سر بينى وبين ربنا واحتفظت بأسرار عدم التحدث فى عدد الموتى اللى ادفنوا فيها ..الجبانة يابنى خلف مقام سيدى عبد الرحيم اللى بيفكرنى بزيارة فاروق الاول اللى كان بيشوف منظر اطفال قنا الحفاة العراة اللى انا كنت منهم وهو يضع حجر اساس المسجد فى 1948.. كل يوم جمعة حين انتهى من قراءة الفاتحة للوالدتى التى اصرت ان تعلمنى حتى الابتدائية اذهب الى مقابر العبارة ابكى كثيرا كطفل صغير اشعر ان الجبانة تحدثنى بكلام غريب وتنادينى ( يامحمود احنا مالناش هوية ولااهل.. الارض دى اللى كانت بتاعتك هى ارضنا الارض دى هى امنا اللى كتبها لينا ربنا لما نفخ فى ارواحنا يامحمود كل نفس ذائقة الموت ..وماتدرى نفس باى ارض تموت ..اقول للجبانة واهلها نعم لااملك شىء غير اننى احبكم وانتم اهلى ) اظل ياولدى ابكى اتذكر منظرى وانا لااملك شىء غير حب الانسان وقلبى اتذكر ان اجمل شىء فى الحياة هو الحب واتذكر ان ممدوح اسماعيل قتل نفسه بنفسه لانه جعل اقدامه فوق رؤوس الناس جميعا اتذكر ان ممدوح اسماعيل قتل نفسه لانه خلق لنفسه الكراهية للشعب المصرى لذلك هو ميت حتى لوكان يعيش فى النعيم فى الخارج وحتى لوبرآه القضاء ..يدعونى الاشلم للصمت وللدهشة واتمنى ان اكون تلميذه فى تعلم الانسانية فيوافق ويكون المقابل الذى اقدمه ان أتأكد اننى احب وأعشق الانسان واقدم عطاءات للانسانية بدون مقابل وهذه هى بداية الجهاد الاكبر فى الحياة كما يطلق عليها
نشرت بجريدة البديل
ليست هناك تعليقات:
إرسال تعليق