مصطفى رنان تسعين عاما من الغناء والبكاء
ناقتى بخيته تشممت جسدى حين قرر اولادى بيعها وماتت بعد اسبوع من بيعها ودفنتها بيدى
انا اخر حداء فى الصعيد والجمال زى البشر فيها الاصيل وفيها الواطى
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
حين سلمه حفيدى لى واجلسه امام عتبة البيت امامى مد التسعينى مصطفى رنان ارجله للشمس وقبل ان احدثه كان صوتا بعيدا للمغنى السعودى محمد عبده يشدوا بأغنية الاماكن ( صرت خايف لاتجينى لحظة يدبل فيها قلبى وكل اوراقى تموت ) امرنى بالصمت والاصغاء للاغنية وبعد ان قال فيها كلام جميل تذكر اخر حداء فى محافظة قنا مصطفى رنان 90 عاما اغانيه للجمل 00تذكر فى البداية محبوبته الناقة التى اطلق عليها اسم بخيتة وكيف انه ارتبطت به لدرجة انها كانت لاتسمح لاحد حتى لزوجته بالاقتراب منها 00اه يابنى كان نور عينى باقى وانا وبخيته ماشينا لمدة يومين فى الجبال من قنا حتى جرجا بسوهاج وانا احدوا لها بالعناء وهى تصغى الى وبخيته لما خف نظرى وقرر اولادى بيعها لم تخرج من عتبة البيت الا بعد ان تشممتنى اعطيت لها جسدى وحين حملوها على العربة كانت تطلق صراخا والغريب ان من اشتراها بعد اسبوع حملها الى وهى جثة هامدة اعطيت لمن اشتراها ثمنها ودفنتها بيدى راحت بخيته مثلما راح نور عينى ثم ينشد اخر حداء قاله على ظهرها ( ياورق الرياحين مالك دابلى 00العين كحيله والحواجب سابلى ) حين يرانى مشدودا لجمال صوته والحداء يكرر النشيد والغناء
( ياواد ياصغير مالك باكى 00دانا صغير والهوا رماكى 00 ابكى على حالى وماجرالى ابكى على عينى وماجرالى 00 ياريس البحور ياللى معدى 0سلم على الاحباب سلام باليدى ) اقول لعمى مصطفى رنان هو صحيح عمى مصطفى ان مغنى الحداء ماكانش عنده حدود ومتاح ليه يقول الى عاوزه بحرية ؟ ايوه ياولدى بس قبل مااقولك لازم تعرف ان غناء الحداء غناء مشرف ومقدس فالصحابة كانوا يحدون واجمل حداء فى صحابة الرسول (ص) هو عبدالله بن مسعود ومن الحداء كان له جمال وحلاوة فى الصوت لما يرتل القرآن لكن عالمنا اللى كان زمان يتيح لينا نقول اللى عازونيه احنا مثلا كنا نتغزل من فوق الجمل كتحدى بين الجمالة بينهم وبين بعض وعلى الجمال ان يرد بنفس القافية والوزن وكنا نتغزل خاصة فى البنت البيضه ( البيضاء) ( يابنت يابيضه وبليتينى ( البلاء) يال على صدرك نقايل تين
والبنت بيضه وكاملة المعانى 00والبنت بيضه ووسطها مبرومى 00حلا شعورها على فراش الرومى ) ثم يأخذنى فى حدائه لقصائد طويلة بين بكاء وعشق وبين هجر وصد وبين عوالم اخرى من الحنين والشوق يحملها صوته لمدة نصف ساعة ثم يقول لك تعبت والله ياولدى بس انا مش عارف ليه انا بقيت اخر حداء فى الصعيد وليه الحداءين ماتوا ومافيش حد دلوق يغنى من فوق جمل
اسأله عن عوالم الجمال وهل يعشق اجناسها العديدة ؟ يجيب امال يا ولدى لازم تعرف ان الناقة وجنس الجمال زى الناس فيها الاصيل وفيها الواطى فالجمل جنس المولد لايفوت صاحبه ابدا اما الجمل جنس البشارى فهو واطى يخزن العداوة ويفوت صاحبه فى الشدة هذا بجانب اجناس نحن نعرف اصالتها ومابها من طبع زى الجمل الزبيدى والرشيدى والعزباوى ولكن افضل الجمال هو المولد لانه يخاف من العيبة ومايعملش الخطأ زى ناقتى بخيته الله يرحمها والمولد يحن للحداء ويصدر صوتا وحنينا حين يغنى له المغنى بالحداء يكون طيب رقيق الجوانح علشان كدا كان بعض الحداءين العظام يبدءون الحداء للمولد بقولهم ( وسع الخدات ياعم ياجرانى ومدى خطاكى وهزى الضريبى ) يقول لى خلصت كتابه اقول ايوه عمى مصطفى ينادى على حفيده من الخارج كى يحمله للداخل ثم يقول له هى اغنية الاماكن امتى تاجيى تانى ؟ يرد الحفيد معرفش ياجد 00 فيطلق حنجرته بغناءها ( والعيون اللى ترسم فيها خيالك والحنين اللى سرى بروحى وجالك ماهو بس انا حبيبى00 الاماكن كلها مشتاقه لك ) ثم يتوقف وينادينى لما كانت بخيته موجوده كانت تمد سلبتها( يقصد خيطها ) لاخرج بها ياولدى 00 ثم يعطينى السلام
محمود الدسوقى
ليست هناك تعليقات:
إرسال تعليق